Kida A Ruwa Part 4 Complete Hausa Novel

         ∆~~~~∆~~~~∆

   Zuwa yanzu hankalin Malam Almu ya fara tashi da rashin samun wayar Sanda. Bai san miyasa ba tun fitar daya dage sai yayi jiyan nan yake jin zuciyarsa na rawa. Ga shi kuma tunda ya tafi ɗin yake kiran wayar tasa yaji ko ya isa gida amma yaƙi shiga. Har Ogansu ya kira shi kuma ba'a ɗaga ba. Yay ƙaramin tsaki tare da zuba tagumi.
         “Wai lafiya kuwa Malam Almu?. Ko har yanzu damuwar Sanda ɗin ce da?”.
        Mole ne ke tambayarsa cikin tsaresa da idanu. Malam Almu yaja numfashi mai nauyi ya fesar, tare da faɗin, “Wlhy hankalina a tashe yake Malam Buba. Sanda bai san ko'ina ba fa a garin nan. Na tabbatar kuma a sanda ya tafi ko yaje tasha bazai samu motar ƙauyenmu ba. Sannan abokina ɗaya dake tashar yayi tafiya dan na kira shi ko Sanda ɗin yazo yace min ai shi yaje gida matarsa ta haihu”.
      “Eh lallai dole hankalinka ya tashi. Amma nake ganin ai Sanda ba yaro bane ƙarami. Ka ƙara masa lokaci mu gani, idan bai dawo ba ko baije gidan ba saika nema alfarmar masu gidan kabi bayansa. Ni sai na riƙe maka gate ɗin idan sun yarda. Tunda kaga yanzu basu wani damu da fita da driver ba zaman banza kawai nake yi”.
         “Aiko na gode malam Buba. Indai haka ne bari ma na kimtsa. Zuwa anjima sai na samu Hajiya da maganar, da safe kawai na kama hanya”.
      “Shike nan, ALLAH yasa a dace”.
  “Amin”.
     Malam Almu ya faɗa yana miƙewa ya shiga cikin ɗaki. Shima Mole miƙewa yay da waya a hannu ya fita wajen gate ɗin yana neman layin Dagger.....

            (((((((@)))))))))

       Yanzu ma dukkan abinda ya dace doctor ya masa. Ya ƙara masa allura guda ɗaya sai magunguna da yazo masa da su yace sai yaci abinci ya sha. Sai ruwan sanyi da yace a ɗan saka masa a jikin dan saukar zazzaɓin. Daga haka ya miƙe. Dai-dai da isowar su Mammah sashen. Dan wayar Nimrah da Imran ya ɗauke a jikin Dadahn ya miƙa mata tana fita falo dan basu damar duba shi kawai tai kiran Mammah tahau yi mata kukan wai Dadah bashi da lafiya. Shine fa hankalinsu ya tashi suka nufo sashen.
        A falo suka iske Nimrah tana kai-kawo. Suna gama hawowa ta gudu wajen Mammah ta rungumeta. Tashi hankalin Mammah ya sake yi, itama ta rungumeta cikin sigar lallashi amma batace komai ba. Sai su Gwaggo Khadijah ne ke tambayar miya same shi??. Bata samu basu amsa ba Daddy Imran da Doctor suke fitowa a ɗakin. Cikin mamaki yake tambayar su, Gwaggo Khadijah tace Nimrah ce ta kira Mammah. Bai ce komai ba face girgiza kansa, sai kuma yace su shiga to shi bari ya raka likita.
      Basu shigan ba kai tsaye, sai sukace Nimrah taje ta sanar masa. Koda ta shiga ta isar da saƙon su yaja sakanni bai buɗe idanunsa dake lumshe ba. Sai zuwa can ya buɗesu ya zuba su a kanta. Ƙasa tai da nata tana wasa da yatsun hannunta.
       “Waye ya faɗa musu?”.
   Yay tambayar a dake. Baya ta ɗan matsa na jin tsoro. Cikin in-ina ta ce, “Dadah kayi haƙuri naji tsoron ganin yanda kake yi ne”.
      Kansa kawai ya girgiza da faɗin, “Zoki gyara min filon nan”.
      A ɗarare ta ƙarasa inda yake, shi kuma ya yinƙura da ƙyar ya tashi zaune. Filon da ya tashi a kai ta ɗauka ta saka jikin fuskar gadon ata bayansa, shi kuma yaja bargon dake gefen ƙafafunsa ya rufa. Sai dai iya ƙugunsa yake. Sannan yace taje ta shigo da su...
 
       ★Babu wanda tausayinsa bai kamasu ba a cikinsu. Dan kallo ɗaya zaka fahimci baya jin daɗi, duk da kuwa shi mutum ne mai tsananin shanye abu da kame kansa. Amma yanda launin idonsa da jijiyoyin kansa ke miƙe raɗa-raɗa sai kamewar tasa ta gagara shanye komai.
       Addu'a sosai sukai masa, tare da fatan samun lafiya mai ɗorewa. Sannan Gwaggo Khadijah ta fara faɗan miyasa tun daren basu kirasu ba. Ƙaramin murmushi kawai yayi amma bai ce komai ba. Ita dai Mammah batama yi magana ba tun addu'ar da tai masa, tunaninta nakan ina Nabeeha? Dan ita ya dace su gani tare da shi ba Nimrah ba, kar dai Muhammad ɗinta ya zama mai fifita sashe akan sashe a tsakanin matan nasa. Yaje da Nimrah tafiya ya dawo sannan ya cigaba da kwana da ita alhalin Nabeeha ya dace ta amshe shi. Sun ɗan ja mintuna a ɗakin dan har Imran ya dawo abu dai na sukar Mammah a rai, shima sun gaisa sukai masa ya mai jiki, ya amsa musu da cewar da sauƙi ciwon kai ne kawai yay masa tsanani. In sha ALLAHU doctor kuma yace zuwa anjima kaɗan komai zai yi dai-dai, yanzu ma yace a sama masa abinci mai sauƙi yaci ya sha magani ya sake kwanciya.
       Sai a lokacin Mammah tai maganar ina breakfast da aka kawo tana kallon Nimrah dake lafe a jikinta. Nimrah ta ce, “Ga shi nan”. Tai maganar tana miƙewa inda yake.....

         ¥¥¥¥¥¥¥¥¥¥¥¥

   Tunda Amimah tazo ta sake sanar mata Dadah ne fa baida lafiya shiyyasa ashe Imran yazo hankalinta ya tashi. A rikice take tambayar miya same shi. Amimah tace, “Ban sani ba Aunty, kece ya kamata kije ki jiyo mana. Dan su Mammah ma har sun zo sun fita, kuma yarinyar nan tun ɗazun tana tare da shi. Kinga sai suma ɗauka ke abin bai dameki ba ko.”
      Nabeeha dake jin kamar zuciyarta zata fito ta nufi sashen Dada, sai dai zuciyarta na'a cikin matsanancin tsoro musamman akan abinda ya faru tsakaninsu asubahin yau. A falo ta samu Imran yana waya, bata tsaya bi takansa ba dan wani jin tsanarsa take a ranta ta wuce bedroom ɗin da suka kwana jiya. Ƙofar kawai ta tura ta shiga batare da neman izini ba balle yin sallama. A dai-dai wannan lokacin Nimrah data gama haɗama Dadah tea ɗin da yace kaɗai zai sha ta isa gaban gadon inda yake. Yanda aka turo ƙofar ya saka zuciyarta bugawa, ta jiyo da sauri tana kallon ƙofar kamar yanda Dadah ya ɗago shima ya kalla wajen. Cikin ido Dadah da Nabeeha suka kalla juna, sai ta tsaya cak gabanta na faɗuwa. Nimrah kuwa kanta ta kawar kamar bataga komai ba. Cike da rashin ji da son ɓatama Nabeeha rai ta canja shawara, maimakon bama Dadah tea ɗin tabar wajen kamar yanda tai niyyasa sai kawai ta kai zaune a bakin gadon kusa da shi, duk da wajen baida yawa saboda yana zaune ne a baki-baki ƙafafunsa a miƙe a yanda su Mammah suka barshi.
      Nimrah ɗin ya kalla, sai ya ga fara'ar fuskanta ta ɓace ɓat, baice komai ba ya ɗan matsa mata danta zauna da ƙyau, dai-dai Nabeeha na ƙarasowa gaban gadon itama ranta a ɓace da ganin zaman da Nimrah tayin, sannan itace da mijin mizai sa ita ta zo, wannan munafunci ne kuma tasan Imran ne ya ƙullashi, zako tayi maganinsa wlhy. Sai dai cikin danne zafin da take ji ta furta,   
       “Subahannallahi My D. Miya faru ne? Yanzu nake ji baka da lafiya, dama ciwon kan bai sauka ba har yanzu?”.
      Tai maganar tana hawowa gadon sosai ta ɗayan ɓangaren, ta kai hannunta a goshinsa, idanun kawai ya ɗan lumshe da ƙoƙarin jinjina mata kan nasa, bata damu ba ta sake sakko da hannun saman wuyansa. Wani irin abu yazo ya tokare maƙoshin Nimrah, sai dai ko kallon inda Nabeeha take bata sake yi ba. Sai ma kofin tea ɗin data miƙama Dadan.
        Nabeeha ta saki ɗan murmurshin ƙeta, dan a safiyar yau ta zauna tama kanta huɗubar shirya abubuwa masu yawa akan Nimrah. Ta saka a ranta zata ajiye shawarar kowa ta gina ra'ayin kanta tunda itama dai ai mace ce, sannan mutum ce ba robot ba balle ta zama abar control ɗin kowa. Tafi kowa sanin wanene Haysam, sannan tace ta zaɓi abinta matsayin miji, duk tsanani kuma ta yarda zata zauna da shi da halinsa. Mizai sa ta cigaba da zaman yin rayuwa a gidan aurenta tare da wata banzar yarinya. Dole ne ta kawar da ita. Dan akan Haysam wlhy sai inda ƙarfinta ya ƙare, ko Mammah data haifeshi dole ta bar mata shi balle wannan shashar yarinyar ƴar cikinta. Badai ita ta aiko Haysam da shatin kiss ba dana turare a jiya. Ta jira nata aiken dan ita a zahiri zata yi.........✍️